سمن وعسل وفاتورة دماء.. ماذا قال السيسي في يوم الشهيد؟

يوم الشهيد
السيسي يتحدث في موضوعات عديدة بمناسبة يوم الشهيد - مصر في يوم

تحدث الرئيس عبد الفتاح السيسي في موضوعات عديدة، خلال الندوة التثقيفية الثلاثين، التي تقيمها القوات المسلحة، اليوم الأحد، تحت عنوان “شهداؤنا في قلوبنا” تزامنا مع احتفال مصر والقوات المسلحة في يوم الشهيد والمحاربين القدامى.

وجاءت أبرز تصريحات السيسي عن أحداث محمد محمود، وما يُجرى تداوله عن حملة 100 مليون صحة، وحقيقة وُعُوده للمصريين، وكذلك آخر تطورات التحقيقات في حادثة محطة مصر.

فاتورة دماء

وقال السيسي خلال الندوة: إن الجيش ليس مسئولا عن سقوط قتلى في أحداث محمد محمود التي وقعت في 2011 في أعقاب ثورة 25 يناير إبان حكم المجلس العسكري.

وأضاف: “كنت مسئولا عن المخابرات الحربية والأجهزة الأمنية، خلال أحداث محمد محمود، وأقدر أقول بجلاء وثقة وأمانة وشرف إننا لم نمس مصريا واحدا خلال هذه الفترة”

وتابع: “لكن لما دخلت العناصر أمام وزارة الداخلية، سقط القتلى يوم بعد يوم لأكثر من ستة أيام، واتعملت منصة عشان تجيب باقي الدولة الأرض”.

وأكد السيسي “قلنا لرئيس الهيئة الهندسية خلال أحداث محمد محمود، لو معلمناش فاصل بين شارع محمد محمود وميدان التحرير، البلد دي هتضيع، وخلال يوم واتنين وتلاثة وأربعة وخمسة اتقفل، وانتهت أزمة القتلى”.

وواصل: “الصورة التي جرى تصديرها أن المجلس العسكري قام بهذه العملية، كما جرى تصدير أحداث ماسبيرو، وأحداث بورسعيد، وأن وزارة الداخلية قامت بقتل الناس في 25، وأنا مش بزور التاريخ”.

واستطرد: “أنا بقولكم يا مصريين حجم الخسارة من 2011 إلى 2015 ضخم جدا، وهنفضل ندفع ثمن كبير جدا لاستعواضه، لأن الناس لم تكن تعلم قدرة تأثير شبكة التواصل الاجتماعي في إدارة الأزمة”.

ولفت إلى أن “المطالب كانت تلقى على الشبكة، وتاخذها وسائل الإعلام في التوك شو بالليل عشان تبقى مطالب واجبة التنفيذ”.

وأكد السيسي أنه طالب بعمل لجنة لدراسة كل الأحداث في 2011 و2013 حتى نضع كل الحقائق أمام الناس، ويدركون كيف تضيع البلاد، وأضاف: “أننا سندفع ثمنا كبيرا لتلك الأحداث”.

100 مليون صحة

وعن حملة 100 مليون صحة قال السيسي: “لما يتقال التطعيم بتاع 100 مليون صحة هيأذي الناس، بقى إحنا نقدر نعمل كدا في نفسنا وولادنا، وانتوا تصدقوا، عملنا الحملة دي لأجل نخفف عن أهالينا، ولقيت فرصة جرينا عليها عشان نخفف عن كل مصري”.

السمن والعسل

وتابع السيسي: “هو أنا وعدتكم وأخلفت، هو أنا قلت معايا السمن والعسل هقدمهولكم؟ هاتوا كل تصريحاتي لما قلت إحنا هنبقى مع بعض في مواجهة تحديات مصر، وقلت تحديات مصر كتير، وكل مرة بكرر لتثبيت توصيف الحالة، كما أكرره الآن”.

تعاطي المخدرات

وفيما يتعلق بتحقيقات كارثة محطة مصر، شدد السيسي على أن من تثبت إدانته سيحاسب، مؤكدا أن أي عامل أو موظف داخل هيئة النقل سيثبت تعاطيه المخدرات، سيجرى إنهاء خدمته بموجب قانون الخدمة المدنية الجديد.

رواتب الجيش والشرطة

وخلال حديثه، وصف السيسي رواتب الجيش والشرطة بالمتواضعة، قائلا: “يا ترى بندي الجيش والشرطة مرتبات إيه؟ يا ترى بيقولونا عاوزين فلوس وبيقولوا مش هانكمل لحد ما تدولنا، لا حصلت ولا هتحصل، والتمن اللي جرى دفعه ميتعوضش خالص”.

وأضاف:” لو قلتلكم أرقام مرتبات الجيش والشرطة هاتستغربوا أوي، أرقام متواضعة وطول عمر الجيش والشرطة كمان كدا.. ومحدش أبدا طلب زيادة”.

وعن أسر العسكريين قال: “في كل لقاء لما بتكلم واسأل أهلي وناسي، مش عاوزين حاجة؟ الإجابة عجيبة، بس صحيح هو بعد اللي قدم ابنه ولا زوجها أنا هديها إيه؟ مش هقدر أدي حاجة، ومهما عطيت ميساويش حاجة جنب اللي قدموه لبلدنا، وكل الشهداء عسكريين أو مدنيين، تمن كبير دفعوه عشان نعيش في سلام”.

ثورة يناير

وفي إشارة إلى أحداث ثورة يناير وما أعقبها، قال السيسي: “المظاهرات في مصر استمرت 200 أسبوع”، مضيفا: “مصانع إيه اللي هتتحرك وتجارة إيه اللي هتمشي، وسياحة إيه اللي هتمشي، هو الاحتياطي للبنك المركزي راح كله 38 مليار خلصوا في سنة ونص، وفي دول جنبنا دلوقتي الناس بتهدر في بلادها”.

وتابع السيسي: “كله ليه تمن، والشعب اللي هيدفع التمن، والاستقرار استثمار”، موجها حديثه لأهالي الشهداء: “وولادنا اللي راحوا عملوا كدا ليه، أقول للست اللي بتدور على دم ابنها وجوزها، وهتعيش بقيت عمرها يعلم بيها ربنا، أقولها عاوزين نأكل، هما راحوا علشان مصر، يبقى نخلي بالنا منها ومنضيعهاش.. هحسابكم زي ما بتحسابوني”.

واختتم السيسي حديثه بأنه على استعداد كامل أن يتحدث يوميا على الشاشة مع المواطنين، وقال: “مستعد أطلع كل يوم اتكلم معاكوا بس إنتوا هتزهقوا مني، وأنا معنديش ملكة الإعلاميين، ولكن بتكلم معاكوا كمواطن مصري وإنسان منكم، أنتوا أمنتوني عليها، والله هقف أنا وإنتوا قدام ربنا وهسألكم زي مابتسألوني وهحسابكم زي مابتحسابوني، أنا خايف عليكم والله.. نخلي بالنا منها ومنضيعهاش”.

رهف عادل

شاهد المزيد

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *